കള്ളം .

ഒത്തിരിയേറെ നാളുകളായി
സ്നേഹിച്ചിട്ടും ഇഷ്ടപ്പെട്ടിട്ടും.
സ്നേഹവും ഇഷ്ടവും
കയ്യാലപ്പുറത്തെ   തേങ്ങ പോലെ
എങ്ങോട്ട് വീഴണം എന്നറിയാതെ
കുറെ നാളായി പരുങ്ങി നില്‍ക്കുന്നത്
ഞാന്‍ കണ്ടിരുന്നു.
കാറ്റിനെ ആണവ   കാത്തു നിന്നത് .
കാറ്റു അടിക്കുന്നിടത്തെക്ക് ചാടാമെന്നും
പിന്നീട് വീണു കഴിഞ്ഞു 
ഉരുളലുകളെ പറ്റി തീരുമാനിക്കാം എന്നുമാണ്
വീണു വീണു ബുദ്ധി വന്ന അവ
ചിന്തിക്കുന്നത് എന്നെനിക്കറിയാം .
ഈ കാഴ്ച കണ്ടു ഞാന്‍
 മനസ്സിനോടൊരു ചോദ്യം ചോദിച്ചു.
ഇടക്കെങ്കിലും നിനക്കിത്തിരി സ്നേഹിക്കണ്ടേ എന്ന്.
അത് കണ്ണ് തുറിപ്പിച്ചു എന്നെ ഒരു നോട്ടം നോക്കി.
ചുണ്ടുകള്‍ വലിച്ചു അടച്ചിട്ടും
മുഴുവന്‍ മൂടാത്ത വായിലെ കൊന്ത്രന്‍  പല്ലുപോലെ
രണ്ടു ചോദ്യം ഇങ്ങോട്ടും വന്നു
ആരെ സ്നേഹിക്കും ?
എങ്ങനെ സ്നേഹിക്കും?
ഉത്തരം അറിയാത്ത  ബുദ്ധി മാന്ദ്യത്തില്‍ 
ഞാന്‍ ചോദ്യം തിരിച്ചെടുത്തു
പിന്നെ മനസ്സും ഞാനും അതാതിന്റെ വഴിയിലൂടെ
കണ്ടാല്‍ തമ്മില്‍ അറിയില്ലെന്ന് നടിച്ചു

പതിവ് യാത്രകള്‍  തുടര്‍ന്നു.